Jean-Pierre Restelliniyo ke endamê Komîteya Vergirewtişê Îşkenceyî (CPT) bi, ajansê ma rê derheqê Vengdayîşê Haştîye û Komelê Demokratîkî û Kongreya PKKyî de qisey kerd.

Restelliniyî îfade kerd ke birê Kongreya PKKyî seba çareserîya meseleya kurdan gamêka cesure û haştîyane yê û vat: ‘’Seba serkewtişê nê prosesî ganî Abdullah Ocalan azad bibo. Ganî dewleta tirke gamanê zelalan bierza. Ez hêvî kena ke nê prosesî de Tirkîya mesuldarîya xo do bîyara ca. Beno ke Qanûnê Bingeyî de vurîyayîşî bêrê kerdene. Abdullah Ocalanî vengdayîşêko tarîxî kerd. Abdullah Ocalan rayberê şarê kurdî yo. Azadîya ey do xizmetê çareserîye bikera.’’

Restelliniyî dîyar kerd ke çareserîya meseleya kurdan de komelo mîyanneteweyî zî eşkeno rolê xo kay bikero û vat: ‘’PKK sey ‘rêxistina terorî’ amebi îlankerdene ke no eqilane nîyo. PKKyî bi eşkera têkoşînê çekdarî ra fek vera da. Ganî PKK lîsteya terorî ra bêro vetene.’’

Jean-Pierre Restelliniyî pare kerd ke ê wazenê şert û mercanê azadan de Rayber Apoyî bivînê û vat: ‘’Ez wazena hîsanê xo  Abdullah Ocalanî de pare bikerê. Her reye mi o dî seke mi merdimêko bêhempa dî.’’