6Paştgîranê kampanyaya ‘’Abdullah Ocalanî rê Azadîye, Meseleya Kurdan rê Çareserîya Sîyasîye’’ û sîyasetmedarê swîsreyîjî yê namdarî Remy Paganiyî ajansê ma rê Kongreya 12ine ya PKKyî ercnaye.

Remy Paganiyî pare kerd ke kongre de birê tarîxîyî ameyê girewtene û vat: ‘’Birê kongre eşkenê seba haştîye mabênê tirkan û kurdan de bibê pirdêk. La hema zî eşkera nîyo ke Erdogan do nasnameyê kurdan bişinasno yan ney. Hema zî sîyasetmedarê kurdî zîndanan de bê sebebî tepişîyenê. No proseso ke hetê Ocalanî û PKKyî ra dîyayo destpêkerdene ganî Erdogan û Meclîsê Tirkîya tewrê ci bibê, destê xo derg bikerê û bê teda seba çareserîye û haştîye bixebitê.’’

Paganiyî îfade kerd ke seba serkewtişê prosesî ganî dewleta tirke demokratîk biba û vat: ‘’Ma do bivînê ke seba demokrasî Erdogan û Tirkîya xo bivurnê yan ney. Tepiştişê kesanê weçîniteyan antîdemokrasî yo. Nêno qebulkerdene ke şaredar û sîyasetmedarê kurdî tepişîyenê. Yew eleqeyê ney bi demokrasî çin o, no dîktatorî ya. Seba serkewtişê prosesî ganî Erdogan bigêro demokrasî. Ganî kesê weçînitoxî bê şertî vera bidîyê. Hetê bînî ra girîng o ke heqê kurdan bişinasîyê û kurdî bieşkê çarenusê xo dîyar bikerê. Nê pêroyî şertê demokrasîyî yê.

Proses de ganî Ocalan bibo serkêşê muzakareyan. Girêdayeyê biranê PKKyî ganî seba prosesî gama verêne veradîyayîşê Ocalanî biba. PKKyî erkê xo kerd. Ganî nika dewleta tirke mesuldarîyanê xo bîyara ca.  Ganî gama samîmî ya verêne azadîya Ocalanî biba.’’

Remy Paganiyî ard ziwan ke çekverdayîşê têgêrayîşî de tayê tehlukeyî zî est ê. Paganiyî vat: ‘’Kolombîya de zî FARCî çekî verdabî la seba ke hukmatî sozê xo nêard ca, beşêkê FARCî ancî çekî girewtî destê xo. Coka Tirkîya de zî beno ke rewşa winayêne biqewimîya. Seba haştîye ganî wird terefî zî bixebitê û xîret bikerê.’’