Kedkarê ke tewrê mîtîngê 1ê Gulane yê Amedî bîyê, înan ajansê ma rê qisey kerd.

Endama TMMOByî Yasemîne Noyan vat: ‘’Ma ewro ameyî tîya de vengê xo berz bikerê. Ma seba cuyêka demokratîke meydanan de yê. Ma vanê ke ganî budçeya nikayêne seba cuye û haştîye bêra xerckerdene. Ganî ma seba aramîye û haştîye biqîrê. Ganî no proses bi qanûnan mende bibo.’’

Endamê Şubeyê Amedî yê Egîtîm-Senî Fesih Ersonmezî vat: ‘’Ma seba bedelê keda xo û heqanê xo tîya de yê. Ewro her ca de xizanîye est a û krîz zêdîyeno. No tesîrê ma pêroyînan keno. Sebebê krîzî şer o. Haştîye eşkena nê krîzî çareser bikera. Coka ganî ma pîya haştîye awan bikerê.’’

Muhendîsa zîretî Ceylane Demîr vat: ‘’Ma seba cuyêka azade vejîyenê waran. Seba kede û heqanê xo ma têkoşîn kenê. Çareserîya xizanîye û krîzî haştîye û azadîye ra derbaz bena. Ma do hertim vajê ke ‘şerî rê ney.’ Şer çîyêkî nêdano şarî.’’

Îdarekarê Şubeyê Amedî yê Egitim-Senî Selman Sagî vat: ‘’Ewro zî ma waran de seba keda xo vengê xo berz kenê. 1ê Gulane tena roja kadker û karkeran nîyo; roja pêro merdiman o. Emser ma bi hêvîya haştîye herikîyayê waran. Ma do hertim seba haştî û keda xo waran de bibê. Ma do vera polîtîkayanê zulm û hêrişî hêzê kede ra fek vera nêdê.’’

Endama Tumbel-Senî Ayşe Erdemcî vat: ‘’Cinîyî her serre hîna xizan benê. Kedkarî cuyêka têdûşte û azade wazenê. Ma wazenê ke pereyo ke sermaye û şerî rê yeno xerckerdene seba haştîye wa bêro xerckerdene. Haştîye hêvîyêka pîle dana kedkaran. Ma hêvî kenê ke haştîye wa mende biba.’’