Endamanê Komîsyonê Edaletî yê Meslîcî yê DEM Partî derheqê Paketê Hukmî yo 10. de meclîs de kombîyayîşê çapemenîye kerd. Wekîlî Zulkuf Uçar, Alî Bozan, Newroze Uysal Aslan û Dîlane Kunt Ayan tewrê ci bîyî.

Dîlane Kunt Ayan vat paket goreyê ruhê prosesê çareserîya meseleya kurdan nîyo û tede
pawitiş  û pêşnîyazî ca nêgenê û nê vatî: “Paket wina ameyo hazirkerdene ke goşê xo huqûq û hetanê mexdûran rê girewtî. Bi vengdayîşê Birêz Ocalanî berê prosesê neweyî ameyî akerdene. Dima ra eşkerayîya 12ê gulane ameye ke sey gama tarîxîye hêvîya pîyaciwîyayîşê şaranê kurdan û tirkan gird kerde. Atmosferê winayênî de her gama qanûnî ke yena eştene gerek semedê haştîya bianore û pîyaciwîyayîşî bêra eştene.

Bitaybetî bedilnayîşê serûberkerdişê înfazî xeyalê bi des hezaran tepişteyan û keyeyanê înan şiknayî. Semedê tepişteyanê sîyasîyan û tepişteyanê nêweşan tede çîyêk ca nêgeno. Neheqîyê ke yenê kerdene dahîna xorîn bene. Paket goreyê Qanûnê Bingeyî nîyo û tede serûberkerdişê
keyfî ca gene. Maxdûrîyetê ke bedilnayîşanê înfazanê verênan werte ra nêameyî wedaritene. Hîssê edaletî reyna hesabanê sîyasîyan rê bîyo feda. Nê pêşnîyazê qanûnî waştişê edaletî yê komelî rê goşê xo girewtî; îmkanê çareserîya demokratîke, haştîya bianore nêşuxulnayî. Seba ke Wezîrê Edaletî Yilmaz Tunçî bi xo sozî dayî rayapêroyîye, şarî nê paketî ra zaf  çî pawitêne.

Ma do semedê wedaritişê îstîsnayê seba muebetanê giranan û şertê keyfî yê semedê tepişteyanê nêweşan û seba ke tepişteyê sîyasîyî usulanê înfazê taybetî ra feyde bikerê pêşnîyazê xo komîsyon de teqdîm bikerê û tay madeyanê neweyan pêşnîyaz bikerê. Hema erey nîyo bedilnayîşê ke hewce kenê hema eşkenê bêrê serkerdene. Komîsyon û wekîlê îqtîdarî gerek waştişê edaletî yê şarî goştarî bikerê. Hema erey nîyo wa pênîyazê ma çarçewaya paket de bêrê serûberkerdene. Ma do tim haştîye komelkîye, huqûq, edalet û seyyewbînîye bipawê.”